Manfiy teskari bogʻlanish

Oddiy manfiy teskari bogʻlanish tizimi, masalan, baʼzi elektron kuchaytirgichlarni tavsiflaydi. Teskari aloqa zanjiri AB kuchaytirish koeffitsienti manfiy boʻlsa, teskari bogʻlanish ham manfiy boʻladi.

Tizim, jarayon yoki mexanizm chiqishining baʼzi funksiyalari kirishga uzatilganda, kirishdagi oʻzgarishlar yoki boshqa buzilishlar natijasida kelib chiqadigan chiqishdagi buzilishlarni kamaytiradigan tarzda qayta uzatilsa, bunda Manfiy teskari bogʻlanish (yoki muvozanatlashtiruvchi teskari bogʻlanish) vujudga kelgan hisoblanadi.

Musbat teskari aloqa eksponensial oʻsish, tebranish yoki tartibsiz xatti-harakatlar sababli beqarorlikka olib kelsa, manfiy teskari bogʻlanish odatda barqarorlikka yordam beradi. Manfiy teskari bogʻlanish muvozanatni tiklashga yordam beradi va buzilishlar taʼsirini kamaytiradi.

Manfiy teskari bogʻlanish mexanik va elektron muhandislik, shuningdek tirik organizmlarda keng qoʻllanadi . Uni kimyo va iqtisoddan tortib, iqlim kabi fizik sistemalargacha boʻlgan boshqa koʻplab sohalarda koʻrish mumkin.

Qondagi glyukoza darajasi tanadagi manfiy teskari bogʻlanish mexanizmi sababli stabil miqdorda saqlanadi. Qonda glyukoza darajasi juda yuqori boʻlsa, oshqozon osti bezi insulin ishlab chiqaradi. Agar daraja juda past boʻlsa, oshqozon osti bezi glyukagon ishlab chiqaradi. Koʻrsatilgan tekis chiziq inson tanasi tomonidan oʻrnatilgan normal miqdorni ifodalaydi. Sinusoidal chiziq qondagi glyukoza darajasini koʻrsatadi.

Manfiy teskari bogʻlanishli kuchaytirgich

Manfiy teskari bogʻlanishli kuchaytirgich 1927 yilda Bell laboratoriyalarida Garold Stiven Blek tomonidan ixtiro qilingan va 1937 yilda patentlangan (AQSh patenti 2,102,671) „1928 yil 8 avgust. 298,155-sonli arizaning davomi. . .“).

Kuchaytirgichlarda teskari bogʻlanishning koʻplab afzalliklari mavjud. Dizaynda teskari bogʻlanish turi va miqdori turli natijalarni yaxshilash va optimallashtirish nuqtai nazaridan tanlanadi.

Kuchaytirgichlarda kuchlanish boʻyicha manfiy teskari bogʻlanishning afzalliklari

1. U chiziqli boʻlmagan buzilishlarni kamaytiradi, yaʼni yuqori aniqlikka ega.
2. U zanjir barqarorligini oshiradi: yaʼni tashqi muhit harorati, chastotasi va signal amplitudasida oʻzgarishlar boʻlsa-da, kuchaytirish koeffitsienti stabil saqlanadi.
3. U chastotaviy diapazonni biroz oshiradi.
4. U kirish va chiqish natijaviy kompleks qarshiligini oʻzgartiradi.
5. Garmonik, faza, amplituda va chastota buzilishlarining barchasini sezilarli darajada kamaytiradi.
6. Shovqinni sezilarli darajada kamaytiradi.

Tashqi uygʻotuvchiga ega manfiy teskari bogʻlanishli kuchaytirgich. Agar βA>0 boʻlsa, manfiy teskari bogʻlanish hosil boʻladi .

Rasmda manfiy teskari bogʻlanishli kuchaytirgichining soddalashtirilgan blok diagrammasi koʻrsatilgan.

Teskari bogʻlanishli kuchaytirgichning umumiy (yopiq sikl uchun) kuchaytirish koeffitsientining miqdori:

$\frac{O}{I}=\frac{A}{1+\beta A}\approx \frac{1}{\beta },$